Kiris-neb sên dàt b rogem-n-mik naam sull siglg wakato.

M pèrètr sômyâ sên get-b nanams sullâ yelle,

M neb sômyâ sên ya b nanamse,

Tônd Soaala Zezi Kirista bark la b laafà zînd ne yâmb fâa !

Yaa Wênd buuda Tiugung yùùr yînga la m zêkd m koèèga n na n pùùs yâmb fâa ne y kênd la ne y waoongo pap Zâ-Pol a yiib soaba zakê Tângê/Wogdgo, m pùùsda labe-râmb nins sên sôngdb nanamsâ, labe Ernès WEDRAOGO la labe Piyèr KAFANDO, m pùùsem be ne kiris neb sên dàt b rogem-n-mik naamâ. M pùùsd-y fâa barka y sên sak n zêk y naoor n wa dûnna sèkâ. D geta dûnna Sibrâ wala nanams sên ya b kiris-neba lagemtaar sull rogem daare Wogdog Tiugung Ro-kâsenga pùgê.

Lagemtaar sull kânga viglgu kôta kaseto tà Tiugung babesda sên deega soob fâa a beoog beoog vààm pùgê sên na n yàlê n sông-a t’a bààs a kiris-nedemda vààm wala sên segde. Sàd me, sên deega soob fâa paama tôog n pùàt Wênd meng vààm n na n lebg mooga yamsem la dûni wâ vêenem. Woto rat n yeelame tà laàk-râmbâ, d rogem-n-mik nanamsa sên be-b-râmb sùkâ, b tara tùùmd sên segd ne bâmba b sên tog n maan Tiugungâ la Zamaanâ pùgê.

1. Laàk dat n yeelame tà bôe ?

a) Tiugung zâmsg pùgê b yetame tà « Laàk » :

« Yaa kiris-neb nins fâa sên ka reeg-b Odre Sakerma, sên pa pùlba Tiugung pùgê. Dat n yeelame tà kiris-neba sên yaa b Kirista yîng wilsi soob maasmê, n lebg Wênd Soolem, n pùàt Kirista sên ya Pèrètr, Bângda la Dîma tùùmde, zîig ninga b sên beê ; Tiugungu la Zamaana pùgê, b maanda kiris-ned buud fâa tùùmd-pakre » (L.G.31).

Zamaana pùgê tùùmde la a vààm yaa layik râmba pùààre. Wênd meng n bool b tà b tùm n me Wênnaam Rîungâ n baase ne têng zug yôodâ zâabo Wênnaam yam maaneg pùgê. B bee dûni kânga pùgê n kêesd b mens zamaana tùùm-pakr buud toor toor pùgê…

Wênd bool b lame tà b tùm zamaana pùgê n kôt’a sômblem wala râ-bàlle, wala yamsem la dûni vêenem :

. b maanda b tùùmd-pakre ne koe-nooga yam-sôngo,

. b pukda Kirista n kôt nimbuiidâ ne b vààm sông kaset kûuni, ne têeb vààga, saagre la sông-taab pùgê.

b) Layik râmba tara zu-zêkre, tà b yaa Wênnaam buud neba

A Pol sông dàka yînga makre n na n wilg Kirista sên vigligTiugung ningâ sên ya a soaba (Rm 12, 4-5). « Tônd ne d tar yîng a ye wâ, d yînga wils ya kùùngo, la wilg fâa le tara a tùùmde. Woto me, tônd ne d yaa kùùngâ, d naaga Kirista n yaa yîng a ye ; ned kam fâa yaa wa a to wilga » (Rm 12, 4-5).

Soob maasmê, wilsa tara zu-zêkr a ye.

Sên paam b Odrâ n yaa buuda pekààmba (n zâmesdê – n legendê – n kôt sômblem)

Vààm pùlemdbâ : môferèèr la masèèr dâmba

Têedbâ sên deeg soobo n ya Layik râmba.

2. Layik râmba tùùmd-pakr la bùgo ?

B boonba layik râmbâ tà b wa sông n tùm tà Tiugung kêng taoore t’a sômblem paasd wakat fâa (D ges L.G. 33)

Kônsil Vatikâ II wilga vêenega tà layik râmba tùmda Tiugung meng tùùmde sên ya Koe-nooga moonego : « Kêng-y, kit-y tà mooga ninsaalb buud fâa lebg m karen-biisi » (Mt 28).

Layik râmba pùàta Kirista sên yaa Pèrètre, Bângda la Dîma tùùmde.

B pùàta pèrètr tùùmde ne Wênd waoogr tùùmde: (pùùsgo, sakrema râmba seglego, sômblem)

B pùàta Kirista sên yaa Bângda la togsênta-sônga tùùmde… ne b têeb kaset kûuni, Koe-nooga moonego, vààm sông kaset kûuni, la ne b noor goama.

B pùàta Kirista sên ya dîma tùùmde :

Kirista sulga b menga hali n sak kûum pik zugu tà b Ba zêk ba n kêes b Rîunga zààr pùgê (Fi 2, 8-9)… Sulg-m-menga/Sàd Naam, Vààm, Zemesgo, Laafi, Nonglem…

Layik fâa tog n kêe dûni kânga pùgê n kô Soaala Zezi vùùgrâ la Wênnaam Vààgâ kaseto…

A Vùùsem Sông vêenega Tiugung t’a viglig Katolik têeb yalgr tùùm sul buud toor toore sên na n yàlê n pids a tùùmd-pakre.

3. Tiugung Katolik têeb yalgr tùùma

Konsil Vatikâ II togs n yàlmame n wilg layik râmba sên tog n pùà Tiugung taoor dâmba têeb yalgr tùùmd toto zamaana zîis toor toor pùsê.

Wala nus-tùùmtùmdba sul pùgê

JOC, sên get katolik kom-bààb nins sên ya b nus-tùùmtùmdba yelle.

Yaa labe Kardizen (Belgique) n viglig sul kânga yùùmd 1925. Labe Kardizen làk n yâeme et yetê : « Nus-tùùmtùmdba n na n yà sên maandb nus-tùùma têeb-tùùmtùmdba. Kom-bààba tùmda ne taaba, bâmb ne taaba yînga ». Dat n yeelame tà sên wênd-b taaba n sôngd taaba têeba pùgê, la tog n yàà boto zîis fâa (D ges Theo 1101).

Katolik têeb yalgr tùùmd sên sigli n tûud zîig fâa sên yalâ sônga wùsg pînda, la Tiugung yetame tà b tôe n kell n maan boto.

Nus tùùmtùmdb zîigê : J.O.C.

Kom-bààb lekol-karen-biis zîigê : J.E.C.

Weoogê koadba : J.A.C.

Mogr-noorê dâmba…, zîig fâa tara a sulli.

Sullâ sigla zîis toor toore la Tiugung ya a Ye Kirista pùgê, n le yaa Katolik sên dat n yet tà na-kê-b-zânga, n mi sull fâa tîiri, n taasd-a Koe-noogâ a sên beê. Sullâ pa tog n wa ne neba sêegr ye ; katolik têeb yalgre tùùma sên siglig zîis toor toorâ, yaa sên na n yàlê n sông sull fâa t’a maan a tùùmd-pakre buuda fâa nafr yînga.

Tùùmda sore : Gese, tagse, manege :

Ges bûmb ning sên be n dat manegrâ

Tags n bâng sên yaa sômb la sên pa sômbo têebâ vêenemê

Siglig tùùmde n maneg sên pa sômbâ.

Katolik têeb yalgr tùùmda pùgê, b nongame n miê n yals n ges vààm sên yà toto n yaool n demes-a.

Koèègâ baasgo

Tiugung pa tôe n kêng taoore wilg-kam fâa sâ n pa maan a tùùmd-pakr neere a sên be zîig ninga Soaala pùùgê wâ ye !

Bà a Vùùsem Sôngo, sên sông n siglig nanames sên ya-b kiris-nebâ lagemtaar sullâ, kell n sông naab fâa, a sên beê fâa, t’a mao ne yamleoogo n paasd-a bângr ne Kirista wakat fâa, n tôog n kolg ne a meng tânkueemde, n sông n me Tiugungu la zamaan noogo.

Wogdogo, desâmbr kiug daar 21 soaba, yùùmd 2011

Môsèyêer Filip WEDRAOGO,
Wogdog Tiugung Ro-kâsengâ Ba.

Pin It